2014-12-02
太陽報
近年被新業主大幅加租而搬走的城中老店，原舖位陸續出現再轉手情況，賺幅比住宅物業理想。有代理老友同劉Sir講，原先由「港大飯堂」老牌餐廳莎厘娜租用咗近半個世紀嘅西環般咸道33號地舖，自兩年前轉手後，剛再度易手。該舖近日以約5,350萬元沽出，呎價約38,214元，兩年賺咗約莫1,450萬元，升值近四成，而住宅物業兩年賺幅只有約兩成幾。
港置至尊旺舖董事陳偉材話，由資深投資者林清林持有嘅般咸道33號地舖連平台，面積共約1,400方呎，剛以約5,350萬元轉手，而林氏就喺一二年以約莫3,900萬元購入，今次沽出賺咗約莫1,450萬元，賺幅達37%。
租金回報逾2.8厘
陳氏又話，新買家其實係住喺同區，而且仲係首次踏入舖位市場嘅投資者。
佢話依家個舖就以約12.8萬元租緊俾一間高級西餐廳，租約至一七年，回報率約2.87厘。其實以劉Sir所知，老牌餐廳莎厘娜因為新業主大幅加租，已經喺上年已經結業，而新嗰間西餐店喺今年開始租用，即係老舖走咗，都要等一排先搵要新租客；而莎厘娜近月先喺高街再開番。
上月亦有消息傳出，英皇國際（00163）持有嘅銅鑼灣勿地臣街12號地舖，買家以約2億元洽購，個地舖係兩年前以約1.46億元購入，咁計升值又咁啱係37%；個舖原先由老牌禮頓麵包租用，做咗逾三十年。
華匯全層9200萬售
近期寫字樓交投唔錯，確利達（01332）公布以9,200萬元沽出北角華匯中心15樓，建築面積約10,963方呎，買方為中國微電子（00139）。
而工廈方面，萊斯梁偉德話，新蒲崗宏輝工業大廈高層全層，面積約10,642方呎，以約3,750萬元沽出。另消息稱，恒地（00012）長沙灣Global Gateway Tower高層05室，面積約900方呎，以呎價逾7,700元沽出。
另外，中原張焯賢話，屯門中央廣場公眾停車場連埋經營權同入契收費亭，共約325個車位招標放售，意向價約1億多元，截標日期為明年一月三十日。
劉Sir