2014-01-20
太陽報
千禧年開始，旺角西洋菜南街部分時間開始劃做行人專用區，條街旺晒。不過，噪音等問題近年惹唔少人反感，區議會去年同意縮減行人專用區開放時間，而運輸署上個禮拜就公布新措施今日起實施，條街嘅商戶當然拍爛手掌歡迎，佢哋估計生意額最少會多一成，有兩個地舖業主已開始提價預租，加幅多達一倍。
事實上，大型鐘錶金行、數碼影音店及化妝品店依幾年繼續「搶租」西洋菜南街店舖，呎租最少500至1,500多元，條街價值可謂寸金尺土。不過，近年街道上擺放嘅易拉架，同街頭藝術表演等愈來愈多，阻礙行人外，聲浪仲影響商戶生意。
地舖預租嗌高一倍
劉Sir親身去睇過，下晝四點行人專用區開放，相隔30分鐘，宣傳易拉架數目已經超過廿個，表演雜技、歌舞及街頭攝影師攤檔數目最少有10檔，有啲圍觀人群更逼到舖位門口，商戶生意大受影響。
資策料助提升人流
有代理話，條街有間地舖，都喺今年約滿，兩個業主不約而同叫定預租，租金加一倍，其中有間由專售二手名牌貨品商戶租用嘅地舖，業主開出每月約200萬元預租，呎租2,000元，另一由連鎖服裝店租用嘅雙號地舖，意向每月租金約200萬元。
資本策略地產（00497）等去年中已率先將該由連鎖甜品店許留山租用嘅西洋菜街舖位預租，新租金要180萬元，較舊租升約五成。集團發言人話，「開放時間縮減可騰出多啲路面，對人流量有幫助。」
賣數碼產品周邊配件嘅Joyce話，「街頭表演人士音樂聲勁大，有個客聽唔清楚佢講解而唔買，唔見咗單生意，所以贊成縮減開放時間，估計生意最少多一成」。
不過，市場都唔係一面倒睇好，美聯旺舖董事盧展豪就認為，縮減行人專用區開放時間，將重現人車爭路嘅場面，估計租金有機會跌8至10%。
運輸署上個禮拜公布，由今日起包括亞皆老街與登打士街之間嘅一段西洋菜南街街道，喺周一至周五恢復行車。
行人專用區實施時段，將更改為星期六下午四時至晚上十時，星期日及公眾假期中午十二時至晚上十時。
劉Sir