2014-11-12
太陽報
佔中佔咗個幾月，二手買賣無疑係少咗，但樓價仍然高企，特別係細價二線屋苑，好似香港仔單幢樓珍寶大廈，樓價就喺約一個禮拜連環破頂。啱啱有個連天台單位以340萬高價賣咗，單位實用呎價14,167元，唔單止創同區單幢樓呎價新高，比起上個禮拜成交嘅同物業高位，仲足足高咗約11.4%。呢期二手買賣雖然靜啲，但係啲細價二線樓做出嚟個價都咪話唔勁，中原周世康同劉Sir講，啱啱成交嘅珍寶大廈頂層連天台單位，建築/實用面積330/240方呎，成交價340萬元，計番實用呎價約莫14,167元，創咗全區單幢住宅呎價新高。
碧堤減價 照創新高
其實珍寶大廈喺上個禮拜先錄得新高呎價成交，當時另一個連天台戶以大約426萬元售出，實用呎價12,716元，呎價已經創咗新高，但紀錄保持短短一個禮拜左右，就畀剛成交嘅連天台單位打破咗。
周世康仲話，今次新買家係上車客，之前都睇過上個禮拜賣出咗嘅連天台單位，但洽談期間經已沽出，所以最後轉買上址，至於原業主○六年持貨至今，帳面就賺咗241.5萬元。
近排二線屋苑錄到唔少高價成交，美聯鄧熾軒話，元朗采葉庭15座中層H室實用面積460方呎兩房戶，售446.8萬元，實用呎價9,713元，創咗屋苑標準分層戶呎價新高。
利嘉閣姚頌唐都話，深井碧堤半島3座高層F室，係實用面積526方呎嘅兩房單位，減價10萬元後以560萬元成交，創同類新高。
海逸高市價8%成交
另美聯殷勒麟指出，紅磡海逸豪園9座高層H室，係屋苑罕有嘅同類三房放盤，啱啱以1,360萬元連租約售出，高市價約8%。
世紀21北山彭志偉稱，北角健威花園C座高層1室以575萬元售出，實用呎價12,835元，高市價一成。
至於近排買賣熱辣辣嘅青衣居屋青泰苑，啱啱又錄到得新高價成交，美聯李永康同劉Sir講，屋苑E座高層8室兩房海景戶，以400萬元售出，計番實用呎價約莫9,975元，創屋苑歷來呎價新高。
劉Sir