2014-11-10
太陽報
近年好多財務公司都積極搶生意，唔少仲講到唔使樓契做抵押，就算半邊業主都可以自行申請按揭貸款，但當經濟環境有波動嘅時候，市場就多咗好多呢類單位攞出嚟拍賣。劉Sir粗略計過，今年到依家經拍賣場賣出嘅碎契或者無契樓，約莫有35個，比舊年全年多咗67%，不過單係碎契樓舊年只係拍出咗3個，今年已經有11個拍出咗，增幅2.7倍。劉Sir不時出入拍賣場，睇吓有冇筍盤執，近排就發現多咗唔少碎契或者無契樓攞出嚟拍賣，而且唔少競投氣氛仲好熱鬧，有啲超筍價拍賣嘅單位，買家分分鐘要搶高三、四成先得手。
今年到依家經拍賣場賣出嘅碎契樓有約11個，無契樓就有約24個，對比舊年全年賣出約3個同18個，已經多咗約2.67倍同33%，加埋嚟計就比舊年多咗約67%。
講到碎契拍賣盤今年成交急增，主要係呢類物業價錢通常會有大折讓，但又唔會好似凶宅咁得人驚，所以唔少資深投資者都吼實。
葵龍半契低五成拍出
好似一向買開另類單位嘅伍冠流，今年最少已經買入咗5、6個呢類單位，上個月葵涌葵龍大廈實用面積約404方呎高層G室半契單位攞出嚟拍賣，開價60萬元，他成功以66萬元買入，相比半份業權市值約137萬元，足足低咗五成。
相比之下，無契盤買入之後無咁多麻煩嘢要搞，所以通常都無咁多折讓，好似之前賣咗嗰個柴灣金源洋樓B座低層戶無契盤，開價187萬元，搶吓搶吓成交價去到210萬元，比銀行估價只係低約15%。
業權分散 3方案可斟
雖然呢類單位係市場嘅罕有筍盤，但亦唔係人人啱買，事關呢類單位按揭上會遇到一定困難，所以最好係手頭有充足資金，預咗一筆過畀晒錢，而且日後想套現，亦會比較難搵客，通常都要平過市價先出到貨。
資深投資者伍冠流教路，買碎契物業由於業權所佔份數唔完整，所以買入之後需要同單位其他業主傾吓，基本上有3種方案，例如可以買埋對方業權、又或者出售自己嘅業權，甚至係共同將單位放租瓜分租金收益，而放租程序與一般租盤無異，租值亦不會因單位屬碎契樓而有折讓。
劉Sir