2014-11-05
太陽報
恒地（00012）近年都幾積極進行舊樓併購，佢哋或有關公司啱啱向土地審裁處就西半山美麗臺大型重建發展，入稟申請強制拍賣。劉Sir知道呢個項目有番咁上下規模，項目佔地約莫5.2萬方呎，估值超過29.95億元，問鼎歷來最大宗嘅強拍個案。呢個西摩道4A至4P號美麗臺重建項目，由恒地及新世界發展（00017）合作發展，係今年第19宗強拍申請。
劉Sir睇過土地審裁處最新文件，項目剛啱入稟申請強拍，申請人持有大約84.6173%業權，呢個地盤佔地近5.2萬方呎，由5幢14層高嘅住宅大廈組成，喺一九六三年落成，共有196伙，測量師估值大約29.95億元。
佔地五萬呎 幾經波折
到依家為止已公布拍賣底價嘅強拍項目，涉額最大係為恒地或有關公司，喺一一年入稟申請強拍嘅西區皇后大道西450至456G號西環大樓，項目最近獲土地審裁處頒下判書，准以29.57億元底價強拍。
一般嚟講強拍底價都會比起入稟申請時嘅估價為高，所以相信美麗臺重建項目，都幾有機會取代西環大樓成為歷來最大宗強拍個案。
唔講唔知，呢個佔地近5.2萬方呎嘅項目今日可以申請強拍都幾經波折，喺○六年初美麗臺近80%業主展開聯合招標，翌年市傳恒地用咗超過28億元協議買入呢80%業權，但因為未能夠喺限期前收購最少90%業權，協議最後告吹咗。
市區項目紛底價成交
但隨住五十年樓齡以上嘅舊樓，強拍門檻喺舊年正式由90%降至80%，財團把握機會加快收購呢個美麗臺重建項目，最後成功集齊逾八成業權申請強拍。
過去一年都有唔少具規模嘅強拍項目成功拍出，好似九建（00034）嘅紅磡環安街重建項目，涉及14宗強拍申請，喺舊年年底成功統一最後兩項舊樓業權，成交金額加加埋埋達約10.03億元。
而鰂魚涌吉祥大廈項目4宗強拍個案都喺今年先後以底價成交，總值9.06億元。
劉Sir