2014-10-31
太陽報
零售市道持續疲弱,太古地產(01972)公布嘅本年第三季度營運數據,佢哋旗下金鐘太古廣場及太古城中心商場零售銷售額由升轉跌。首三季分別按年下跌1.1%及3.4%,去年同期則同錄得上升,而東涌東薈城名店倉僅錄得6%升幅。不過,新地代理租務部總經理鍾秀蓮話,旗下銅鑼灣wtc more世貿中心同上水廣場等共9個商場,首三季人流及營業額都仍較去年同期多15及19%。
劉Sir收到太古地產嘅第三季度營運數據,太古廣場同太古城中心商場今年首三季嘅零售銷售額,按年分別下跌1.1%及3.4%,去年同期兩商場錄得2.1%及2.7%升幅,而太古城中心錄得較大跌幅,原因係商場進行優化工程,零售銷售額並無對因商舖暫停營業所流失的銷售額作調整。
谷旺聖誕 新地揼多10%
另外,東薈城名店倉首三季零售銷售額亦只錄得6%升幅,較去年同期大幅收窄10.5個百分點。寫字樓方面,該集團旗下鰂魚涌太古坊首三季租金錄到27%升幅,呎租逾40元。
另外,新地鍾秀蓮同劉Sir講,旗下九個商場,包括銅鑼灣wtc more世貿中心、新蒲崗Mikiki,同埋上水廣場等,首三季整體人流及營業額分別達2.76億人次及107.5億元,分別較去年同期上升15及19%。
佢預計第四季該九個商場總人流達1.09億人次,營業額可達41.4億元,較去年同期分別上升15及16%。
聖誕節檔期將至,鍾氏話會投放約3,280萬元宣傳費喺商場度,較去年同期增加10%,預料十二月二十至二十八日期間,九個商場總人流及營業額可達981萬人次及約4.93億元,較去年同期升18%。
對於佔中,鍾秀蓮話,運動早期對銅鑼灣wtc more世貿中心商戶構成輕微影響,惟現時局勢有所緩和,相信未來商場生意不會受到太大衝擊。
糖街商舖標售嗌億五
另外,中原陳偉國話,同區糖街商業大廈地下B2舖以招標形式放售,面積約1,000方呎,意向價約1.5億元,截標日期為下月十二日。
劉Sir