2014-07-30
太陽報
住宅市場嚴重缺盤，多個翻拍銀主盤罕有受到市場追價同搶高賣出，其中天水圍嘉湖山莊麗湖居高層加價翻拍銀主單位，竟有買家主動要求第一口價承價由5萬跳價到30萬元，當堂嚇壞對手，以360萬元承接。另外，減價翻拍的九龍站君臨天下銀主豪宅單位，亦被搶高咗70萬元，以2,230萬元拍出。
劉SIR尋日去咗忠誠拍賣行，今次總共有約莫6個銀主盤拍賣，有中細價樓，亦有豪宅，當中四個仲係翻拍，其中嘉湖山莊麗湖居3座高層A室，實用面積635方呎，之前曾開價308萬元拍賣，競投至358萬元收回，今次開價加到330萬元。
大膽出價對手縮沙
拍賣師開始個陣以每口承價5萬元推拍，但係有個買家即場提出跳價到第一口30萬元承價，隨即嚇怕其他買家，最終就由該名買家以360萬元購入，實用呎價約5,669元。
另外，豪宅君臨天下亦有一個1座中層F室連車位銀主盤，實用面積1,062方呎，今次開價2,160萬元，較之前2,328萬元減價168萬元翻拍，該單位最終獲承價8口，以2,230萬元拍出。聽講該單位喺○九年以逾2,000萬元買入，曾經兩度承按，原業主同一名生果商人的女友名字相同。
同場將軍澳新都城2期5座高層E單位連車位就獲多個買家追捧，單位實用面積735方呎，開價700萬元，獲承價18口，以785萬元拍出。另外觀塘廣生行中心高層08室寫字樓，開價730萬元，拍賣師講明每口承價10萬元，但又有買家要求第一口跳價到50萬元承價，終以780萬元拍出。
細價物業料更搶手
該行鄭世傑話，尋日有買家為避免同其他買家競爭，搶高成交價，所以就決定主動大幅跳價，務求擊退對手，另外佢又話，而家喲買家已經適應左樓市辣招，相信係未來日子，500萬元以下的細價樓都會比較搶手。
高緯環球張翹楚話，六月份住宅成交近6,000宗，樓價方面，上半年1,000萬元以下住宅樓價出現約1至2%增長，市場對住屋有剛性需求，預期樓價1,000萬元以下住宅今年全年樓價料升約5%。
劉Sir