別人勤力我懶惰

有老友最近知道我們買了3層寫字樓，動用了十幾億現金，而事前又唔見我提及，甚至連樓都唔去睇，話我不但魯莽，而且太懶，遲早會出事，現在就算做得不錯亦只不過是有些運氣，他實在替我擔心。其實，老友擔心都是多餘，連我的事也要擔心，自己的事反而做得不好，不如先做好自己的事，我的事留給我自己擔心。 平日多睇樓 價早在心中 老友話我太懶惰，連樓都唔去睇就出咁重手買，如果是其他人，不但會左計右算，仲會問一些專家的意見，出一份可行性報告，在這個時勢，出價應該保守一些。其實老友只知其一而不知其二，見到我出手快就話我懶，但他又唔見到我勤力的時候。 我所買的甲級商廈，以前已經睇過唔知幾多次，心中早有一個價錢，如果未到心目中理想價情願唔買；亦有老友知道我不時睇樓話我浪費時間，唔打算買就唔好睇。老友唔知道我的策略是別人懶惰我勤力，當大家唔去睇樓，那些物業代理招呼都會好一些；現在樓價下跌，大家急急忙忙去睇樓，計算出價，非常勤力，我反而懶惰，連樓都唔睇就出價，大家都覺得很奇怪，其實我是向股神巴菲特學習。 人貪婪時會忽略不利因素 巴菲特的金科玉律就是「別人貪婪我恐懼，別人恐懼我貪婪」，巴菲特並不是與民為敵，而是他做足功課，知道大部分人貪婪時就會忽略了那些不利因素，所以他反而恐懼，將手上的股票出售；但當其他人恐懼時，就會漠視那些有利因素，他就會變得貪婪，大量買入股票。我沒有巴菲特那麼醒目，又控制不到情緒，做不到別人貪婪我恐懼，只能做到別人勤力我懶惰，別人懶惰我勤力。