好解籤師傅如何煉成

唔知邊個將「每逢佳節倍思親」改為「每逢佳節重幾斤」，在農曆新年後，幾乎唔敢上磅，好彩在極度忍口節制之下，重了唔夠一公斤，雖然滿意，但仍然堅持在星期日早上跑10公里，其實近日天氣非常適合跑步，跑十公里不是太辛苦，跑完步去茶餐廳食個早餐，吹下水，都幾開心。 正當我同茶餐廳老闆吹水時，聽到隔籬枱有個類似阿媽女人，叫個仔唔好讀書，走去學做解籤師傅，仲話這個行業當旺，寧買當頭起，阿媽仲叫個仔問我講得啱唔啱，我當然話啱。不過，大家所見，現在解籤佬的學問水準太低，要在這行業出類拔萃，一定要入大學讀書，主修中史，副修英語，以後中外人士通殺，生意無憂，佢阿媽竟然話我講得啱，如果唔做一個本科生，以後有人以碩士甚至博士身分去做解籤佬，個仔要搵食就很艱難，仲多謝我解決了他們的難題，其實我唔知道他們多謝什麼。 家宅必答平安 前程當錦繡 我講大家或者未必相信，我有一個小學老師，他聲學畢業，唱男高音，每年校慶都是由他領唱，後來話教字不出頭，走左去黃大仙做解籤師傅，真的是發過豬頭，十年前已經有幾層樓收租，老師咁發原來他發明了一套解籤秘笈，不會梗唱好或者唱淡，任何籤去到他的手中，無論是大吉或者下下，如果問家宅，一定會答平安，問自身就難保，問前程當然錦繡，求財就會答不遂，理由很簡單，問家宅代表很多人，如果話家宅不吉，就會搞到人心惶惶，如果問自身，即是有困難，答難保只不過是叫求籤者小心一些，前程是很遙遠的事，如果勤勤力力，加上一點運氣，一定會是錦繡，求財即是要個天跌錢落嚟，當然是不遂，人無辛苦力，哪得世間財，老師憑這四招食盡解籤界。 打好中史底 死可拗番生 不過老師同我講，這四招是基本功，最緊要是學問水平夠，尤其是中史，死都可以拗番生，很可惜老師現在唔做，否則今年由佢解籤，雖然全部都是下下，老師一定講到是中吉甚至上上，而且不會露出破綻，全香港人都會很開心，不似得現在畀幾支籤攪到一鑊粥。