孤天寡九 唔打又一首

在過年期間，我不時被人問到現在是否可以買自住樓，因為有評論員話，去年11月底樓市已經開始谷底反彈，亦有評論員話樓市到了年初七，已經調整完成，再次向上攀升，如果現在唔買樓，恐怕會錯失良機。他們其實早已打算買樓，問我其實是多餘，不過在新年期間，很多事都是多餘的，就算恭喜人都是多餘，當然是望人富貴，唔通希望別人「閉翳」？問我好不好買自住樓，一定要話好，唔通話唔好？但要想一個好答案，如果又學誠哥話量力而為，一定會被人噓。 得一注錢 唔買或錯過撈底機會 我記得第一次買樓，見到燊哥，順便問一問，燊哥知道我是澳門仔，不但是第一次買樓，而且資金不多，於是連想也不想就話「孤天寡九，唔打又一首」，打天九的人都知道，一副牌只有一隻天或者九，能夠結牌的機會很小，如果要結牌，一定要等到尾二才出牌打人，而最後一隻細牌又沒有被人打，但機會始終不大，如果等結牌隨時一棟都冇，有一棟輸三，一棟都冇輸五，所以，一般打天九的人揸住一隻天或者九的牌，倘若有機會，連考慮也不用，一定會大力打下去，唔識打天九的人未必會明白，香港好似是唔准打天九，因為天九可以隨時變成排九，天九牌就變成賭具，香港仍然是禁賭的。 有能力買自住樓的人就好似揸住一隻天或九，如果要考慮清楚，又擔心什麼什麼，始終買唔到樓，到最後樓價又升了，他們又後悔到不得了，其實只得一注錢買樓，就好似孤天寡九，還需要考慮什麼？買樓當然有風險，但樓市現在下跌的幅度有限，長遠必升，現在唔買樓，可能錯過了撈底的機會，但亦有可能一棟都冇，即是永遠都不會有自己的物業，買樓的人如果只得一注錢，而又有需要的話，根本不用問其他人，孤天寡九，唔打又一首。