《代理向業主鋤價後才搵買家》

星期三早上去到茶餐廳，有客人話今次真係頂住條氣，他有一個商業單位，有代理畀一個好低價錢，不斷游說佢賣，仲話如果唔賣，樓價只會愈來愈低，最後，他接受代理出價。隔了一段時間，代理話那個客人縮沙，不過，有另一名客人有興趣，只是價錢更低，客人話上一個價錢已經很難說服自己，再降價是不可能，最後交易告吹，客人唔明白頭一位買家點解會縮沙。

老闆話，很大可能根本沒有第一個買家，這是某些代理的慣用招數，他們在未有實在買家時，先虛構一個買家，向打算賣樓的業主鋤價，當鋤價成功之後，代理才去搵買家。由於價錢已經低過市價很多，不難搵一個實在買家，亦不排除有新買家仍然要價錢低一些，所以，物業代理仍然要鋤價。當然業主可以唔賣，不過，很多時業主被人鋤價時已經入晒局，減多5%至10%都無問題。老實說，現在是買家市場，很多業主被銀行追補差額，被人鋤價亦在所難免。不過，鋤價代理亦有風險，由於鋤價鋤得太低，很容易被另一個買家買走，代理收唔到佣金，只是為他人作嫁衣裳。