2026/11/03
湯文亮
星期一早上去到茶餐廳，有客人話周末有一單大嘢，領展（0823）連自己地方都要賣，以23億元賣旺角T.O.P，連裝修建築費，估計要蝕大約40億元，而且售後做返管理，有違「賣仔莫摸頭」傳統做法，因為一般投資者賣了物業，唔會替買家做管理，否則，日後物業大幅升值，就會畀買家笑，究竟領展點解要賣樓，是否睇唔好後市，或者是財政有壓力。
料與財政壓力無關
老闆話自己知條鐵咩，而事實上領展點會有財政壓力。至於是否睇唔好後市，理論上又唔係，樓市最壞情况已經過去，金管局亦溫馨提示，銀行可以向地產商適度放貸，有銀行支持，樓市就算唔升，都唔會下跌，真係唔知領展點解蝕大本都要賣樓。
新CEO一般不守住蝕本物業
其實這是職場的一個習慣，T.O.P是由領展上任CEO買入，換了CEO之後，新CEO是不會守住蝕本的物業，因為就算該物業價格回升，他亦不會有任何得益，所以新CEO一定會將物業出售，蝕幾多都唔緊要，反正他不用孭鑊，職場叫這種行為作「鞭屍」，賣了T.O.P之後，新CEO手上有錢，又可以再投資，賺了錢之後，他便有可觀的花紅，所以，在某個程度上來看，新CEO認為樓市已經見底，很快領展又會出手買物業。
老闆話未聽過，咁又唔出奇，畢竟唔係好多人夠膽寫，冇人寫就少啲人知。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
