2026/10/29
湯文亮
星期三早上在茶餐廳飲奶茶時，有客人走入嚟同老闆講，街口有人打架，老闆德高望重，應該走去勸和，老闆話茶餐廳很忙，等一陣才去，現在去無作用，於是繼續招呼客人。報料的人話老闆冷血，老闆一笑置之。
隔了半小時，老闆主動行去勸和，兩分鐘就搞掂，返到茶餐廳有客人話，兩分鐘可以解決的事，點解唔早啲出去？老闆話，早去都無用，他們仲有大把精力，隨時會傷到自己，等他們打到殘晒，自己都唔想打，有人勸就借勢唔打，所以，兩分鐘就可以搞掂。老闆話並不是自己特別叻，而是時間剛剛好，如果等多一會，勝負很明顯，佔上風的一方又唔想停手，所以，勸和是否成功，時間是很重要。
美伊戰爭打了一段時間，曾經由巴基斯坦做和事佬，安排雙方和談，結果乜都傾唔到，當時就有人講，點解唔係中國勸和促談，畀巴基斯坦冷手執個熱煎堆。了解的人知道，做和事佬除了實力之外，時間亦很重要，當時美伊雙方精力旺盛，拉都拉唔停，做和事佬最終得個做字，咁粗重工夫等巴基斯坦去做。
有客人問，美伊戰爭仲要打幾耐，老闆話很快就會完結，因為中國準備出手，已經唔用勸和促談，改為止戰促談，即是美伊雙方唔好繼續打，坐低慢慢傾，雖然短期內並不會和談成功，但起碼雙方唔會繼續打，和談算是已經成功了一半。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
