《陶淵明話唔好咁早退休》

星期二早上去到茶餐廳，有客人問老闆幾多歲，點解仲唔退休，老闆話剛剛過了70歲，但未有打算退休，况且茶餐廳的工作都是手板眼見工夫，做慣做熟，絕對唔辛苦，退休之後反而唔慣。

客人話真係好奇怪，法國動亂，其中一個原因是退休年齡，本來是62歲，法國政府打算逐步延至64歲，市民唔肯，於是上街示威，但是在香港，做到七八十歲的香港人都不知幾多，香港人咁長命，平均年齡為85歲，都唔知是否同退休有關。

老闆話，香港人唔肯退休是潛移默化，香港的中學課本有一篇由陶淵明所寫文章叫《歸去來辭》，很多人認為陶淵明不為五斗米折腰，仲話實迷途其未遠，覺今是而昨非，劈炮唔撈，好有性格。及後，陶淵明寫了《歸園田居》，種豆南山下，草盛豆苗稀，證明他在退休後生活得很寫意。太早退休，生活百無聊賴，陶淵明失去自我，於是寫了《五柳先生傳》來形容自己，先生不知何許人也，亦不詳其姓名，宅邊有五柳樹，因以為號焉。無錢飲酒，靠朋友接濟，不過，他亦知進退，既醉而退，曾不吝情去留，唔會騷擾到主人家。

到了最後，陶淵明真係無晒錢，搞到要別人幫忙，寫了篇《乞食》，其實，佢可以唔寫，但是他要推翻以前說法，千祈唔好不為五斗米而折腰，唔好咁早退休，否則晚年是好慘，所以，香港有咁多老年人在工作。