《解體前是最團結》

星期日早上去到茶餐廳，有客人話，以前政府的土地投標，很多時有十個八個地產商共同發展，但近年已經唔多覺，究竟是地產商已經發了達，唔需要搵人合作，抑或經過合作之後，很難得到一個大家都滿意的結局，所以，現在很少見到很多地產商一齊合作發展起樓。

老闆話，見過鬼仲唔怕黑，地產商合作發展，在賺錢之前先講責任。十幾個地產商合作，實力有強有弱，萬一樓市轉勢，項目變成負資產，究竟是否繼續下去？實力強勁、有信心的，當然希望繼續守落去；實力較弱，或者唔夠信心，有可能要求止蝕，否則就要實力較強的承受他們的份額。不過，無論結果如何，結盟都會解體，悲劇收場。解體之後，樓市回升，倘若地產商當日不解體，大家都可以賺到盆滿缽滿。大家以為結盟可以增加實力，其實結盟是很脆弱的，結盟的事，一次就夠，所以現在很少見幾個地產商合作發展，就算有，大家都是咁高咁大。

歐盟比地產商結盟更加脆弱，地產商結盟是為了共同利益，歐盟是為了共同責任，而且歐元區21國共用一套貨幣政策，即是一家人共用一個決策，遲早會出事。現在法國出現動亂，很可能是歐盟解體的開始，不過，要用很長時間。但有一個現象，解體前反而是最團結，就好似當年地產商要放棄一個蝕錢項目，大家反而要盡力完成，賺蝕都可以有條數畀大家睇，不能夠完成是蝕得最多。