《現在買樓 一分錢兩分貨》

星期三早上去到茶餐廳，有客人話最近買了一個寫字樓單位，樓價不但比三四年前跌了四成，而且樓層更高，方向更好，現在買樓，真係可以用一分錢，買到兩分貨，但點解業主要賣，唔通他們睇唔好樓市？

老闆話，正好相反，業主以往睇樓市睇得太好，不知不覺買多咗，但又唔捨得賣走一些次優質的物業，借貸比率愈升愈高，本來都符合銀行要求，但樓市在爆發新冠疫情之後突然下跌，住宅物業還好些少，商業物業出現大量空置，估價下跌，銀行按合約追差額。銀行對商業物業的按揭審批甚嚴，一般人根本借唔到錢買物業，投資者在別無其他辦法之下，唯有減價賣樓，但如果物業的樓層及方向不佳，減價都未必賣得出，投資者唯有攞手上最優質的物業，仲要減價才可以賣走，買樓的人可以用一分錢買到兩分貨，老實說，這個環境不會經常發生，有能力的確要考慮買樓。

有客人話有分析員同佢講，持有多個物業的投資者一定睇樓市唔好，否則都唔會賣走手上最優質的物業，叫佢唔好咁心急買樓，即使一分錢兩分貨都唔好買，樓價仲有得跌。其實，無人可以預見未來，樓價是否會繼續下跌真係唔知，即使樓價繼續下跌，都未必可以買到優質物業，一分錢最多可能買到分半貨，買唔到兩分貨。