2026/10/12
湯文亮
星期日早上去到茶餐廳，有客人話星期六去一間酒樓食飯，叫了一個6人餐，點知唔夠食，要叫多兩個小菜才勉勉強強，記得兩三個月前去食過，同樣是6人餐，根本食唔晒，點解有咁大差距。
老闆話，昨晚酒樓生意一定好旺，生意旺就是缺斤少兩的元凶，唔係酒樓想缺斤少兩，而是備料唔夠，無辦法才缺斤少兩。中國人的包容性很高，見到酒樓生意咁好，即使缺斤少兩，招呼差些，都唔會投訴，就算茶餐廳都是一樣，生意太好，麵粉唔夠，本來只整20個麵包，可能會整夠24個。
近日有新樓被發現偷工減料，行外人會以為樓市唔好，樓價下跌，發展商為了節省成本，才會偷工減料。其實不是，發展商在樓市下跌時賣到樓，已經開心到飛起，梗係希望買家如期成交，如果偷工減料，被買家搵到理由踢契唔成交，發展商就損失慘重；
反之樓價上升，買家在交樓時發現樓價有10%至20%升幅，發展商建樓時可能馬虎一些，他們唔擔心買家踢契唔成交，就算唔成交都無所謂，最多退返錢畀買家，就算加埋利息，再賣仲賺多啲。所以，買樓之後見到樓價下跌，都唔好咁傷心，可以從另一角度考慮，發展商交樓的質素有保證。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
