《若有來生 一定要做物業投資者》

星期二小病初癒，早上去到茶餐廳，聽到有客人話周末與一班「失意軍人」，即是物業投資者食飯，真係唔去好過去，聽班物業投資者係咁呻，不外乎被銀行call loan，將他們的物業變成銀主盤，甚至逼他們賣樓，自住的、自用的都唔放過。

近日，物業投資者可能AI重生劇睇得多，竟然異口同聲話，若有來生，一定唔會做物業投資者。

老闆問我，若有來生，會唔會考慮繼續做物業投資者？我話唔使考慮，一定會繼續做物業投資者，最驚唔畀我做。既然知道銀行會因物業估值下降而call loan，在樓市高位時賣走手上最差的物業，就算平啲都賣，保持借貸比率在安全水平，否則，如果被銀行逼賣樓，就只能賣走手上最優質的物業，這個道理叫「逢三退一」。所有投資者都懂，但是能夠做到的十中無一，今次甚至是全軍覆沒，以後都唔會有物業投資者，就算有都是那些細眉細眼，炒幾百萬樓仔的人，或者是內地人、新加坡人，今次香港的物業投資者可以話被香港政府一網打盡。

有物業投資者唉聲嘆氣同我講，若有來生，一定會趁樓價高的時候賣走手上所有物業，到了所有物業投資者都唔掂，甚至發誓若有來生，不再做物業投資者的時候，就慢慢收購他們的優質物業，到那時候，想唔做地產界一哥都唔得。不過，大前提都是要若有來生，如果無來生，所有的念頭都是空想，前世唔記得「有今生，無來世」這句說話。