《中國可投資美債 不代表散戶可跟風》

星期六早上去茶餐廳，有客人話10年美債息5.26厘，佢老婆話美債評級AA+，安全到不得了，應該考慮買返多少美債，如果可以做槓桿就更加好，聽講可以做10倍槓桿，簡直是躺贏。不過，佢想問下大家意見，有人同佢講，如果中國買美債，可以跟風買返多少，中國未買之前，千祈唔好買美債。

老闆話，中國的確應該考慮買美債，除了美債息非常高之外，特朗普亦會感激中國，在其他涉華問題上，尤其是台海問題，可能手鬆一些。以今次高市早苗在美國受到的待遇，中國買返千幾億美債作為投桃報李是合適做法。不過，即使中國政府買美債，中國人民都唔應該買，所謂AA+評級，亦要顧及買債人的實力，如果是個人買美債，不但得唔到保障，甚至惹上官非，實際連BB+也不如，所以，打算買美債的人要有自知之明。

美債規模逾40萬億美元，隨時會賴債唔還，持有美債的人隨時損失慘重，已經買咗就冇辦法，現在買似乎不智。老實說，美債只是「荷包兜肚」，大約八成美債都是由美國人持有，美國賴債，不但最大損失仍然是美國人，而且美國失去信譽，美元不值錢，同自殺差不多。不過，中國可以買美債，中國人就唔可以買，因為美國有很多合法方法凍結個人持有美債，話雖凍結，但唔知幾時會解凍，君子不立危牆之下，有咁多嘢可以投資，唔係一定要買美債。