《美國最無膽官員》

星期一早上去到茶餐廳，有客人問，特朗普的官員當中，邊個最無膽，是否戰爭部長海格塞斯？因為史詩怒火已經打了半年，到現在仍然唔敢派地面部隊進入伊朗，拖到被伊朗反擊，所有在中東的美軍基地被炸到稀巴爛，咁無膽點做戰爭部長？

老闆話，海格塞斯不但唔係無膽，反而熟讀《孫子兵法》，知道「知己知彼，百戰不殆」，史詩怒火只是速戰速決的戰略，如果唔成功就要打持久戰，甚至要與伊朗和談，派地面部隊進入伊朗簡直是送死，海格塞斯唔想有咁多美軍傷亡，唔算無膽。

雖然有人話最無膽的美國官員，應該是美國聯儲局主席沃什，特朗普打晒開口牌，畀晒膽佢，沃什都唔敢減息，其實唔關沃什的事，美債息不斷咁升，美聯儲又點可以減息，沃什唔應該食呢隻死貓。

有膽應減息非加息

最無膽的美國官員，應該是財長貝森特，10年美債息升穿5厘，對於美國來說，是一件非常無面的事，但又難怪，美財長貝森特是一個基金經理仔出身，都未見過大場面，他以為高息是唯一吸引投資者買美債的招數，其實如果夠膽的話，美國不但唔應該加息，仲要減息，雖然未至於好似特朗普咁講，美債息應該在1厘以下，但3厘是有可能。因為持有美債的投資者唔敢唔買，否則如果美債爆雷，他們就血本無歸。

不過，有無膽是無得教，是練返嚟，做官做耐啲，或者會夠膽。