《有錢佬退休 需搵到能守業的人》

星期二去到茶餐廳，聽到大家講歷史，講及歷史人物：唐宗宋祖、秦皇漢武。有一個年紀非常大、非常有錢的客人話，最羨慕李淵，搵到有實力接班人，可以守住大唐，安心做太上皇，最後仲生咗十幾個仔。其實，客人都想退休，雖然幾個兒子都學有所成，在學術界有多少地位，但心地太好，慈不掌兵，很難守住家業，所以他仍然未能夠退休。

老闆話，搵接班人唔係好似福音咁講，有三個兒子，每人畀一筆錢給他們，邊個賺得最多錢，就可以成為接班人，因為那個兒子可能只識得攻唔識守，遇上風浪就會輸晒家當，亦唔係搵一個守財奴，唔識得面對市場變化，最終被市場淘汰。

古時皇帝放手讓兒子互相鬥爭

接班人一定要心狠手辣，因為最大挑戰並不是來自外面，而是內部兄弟姊妹之間鬥爭，有錢佬對這些鬥爭並不是視而不見，但亦唔會作出太多干預，如果連自己的兄弟姊妹都贏唔到，又如何同其他人競爭？如何守住家業？歷代帝王亦深知這個道理，所以，他們並不太理會皇子之間鬥爭，皇帝知道，能夠脫穎而出的皇子才可以守住皇朝。不過，皇帝沒有退休這回事，所以，即使搵到接班人，都未必能夠在適當的時候交到他的手上，現代有錢佬就唔同，如果搵到一個合適子女守住家業，的確可以退休。