《應否賣美債買比特幣？》

星期二早上去茶餐廳，聽到有客人講，有對冲基金創辦人預計，美債3年內爆煲，呼籲投資者減持美債，增持比特幣及黃金，問他是否應該照做？

老闆話，以前啲人講「能知三日事，富貴千萬年」，現在唔好講3日咁耐，3分鐘就可以，好似港交所（0388）在公布中期業績前股價不斷下跌，但中期業績股東應佔溢利有24%增長，公布之後股價立刻反彈，所以3日已經太耐，更何况3年，對冲基金創辦人講咗等於無講。

比特幣風險一定高過美債

大家可以做一個小實驗，撇開黃金唔講，問任何人如果只准買美債或者比特幣其中一樣，應該選美債抑或比特幣？老闆話，唔使問阿貴，梗係選美債。其實，大家點樣揀已經好明顯，比特幣的隱蔽性咁高，出咗事都唔知點追，况且比特幣已經推出17年，當日的隱蔽科技可能早已被破解，被人偷咗都無人可憐。美債雖然有爆煲危機，但那些危機已經傳了唔知幾多年，傳極都未爆，在未爆之前，最低限度有美國政府做擔保，又有5厘收益，何樂而不為，如果講風險，比特幣一定高過美債，對冲基金創辦人是否講反話。

創辦人叫人賣美債、買比特幣，其實將美國政府踩落地，一隻唔知邊國家發行，發行了幾多都唔知，又無收益，又唔流通，交易時要偷偷摸摸的比特幣，竟然將美債比下去，簡直是侮辱美債。

老實說，如果美國政府知道美債有危機，一定會擾亂其他金融產品，令人覺得買美債才是最安全，要搞比特幣亦很容易，只要公開過去沒收比特幣人名及金額，睇吓仲有無人夠膽賣美債、買比特幣。