《揀接班人 要學楊堅》

星期三早上去到茶餐廳，有客人話有一個非常有錢老友，生前在揀接班人的時候效法福音故事的做法，3個兒子每人都有一大筆錢做生意，3年之後睇成績。大仔高槓桿比率投資，賺到最多錢；二仔低槓桿比率投資，都賺到唔少錢；三仔最無用，將啲錢放入銀行收息，於是無資格接手家族生意。在客人有錢老友過身、大仔接手生意之後，很快將成副身家輸晒，所有朋友現在都非常唏噓，唔通聽福音講都有錯。

老闆話，中國人梗係聽中國人講，隋文帝楊堅是非常節儉，是兩餸飯始祖，提倡每餐不多於一肉，5個兒子都非常奢侈，知道交到他們手上，隋朝很快滅亡，唯有打算從5個兒子當中，搵出一個無咁奢侈接班。

楊廣母親文獻皇后獨孤伽羅知道之後，叫楊廣保持低調，放棄奢華，結果楊廣順利奪得政權，成為隋煬帝。之後楊廣恢復本性，奢華無比，最後被李淵、李世民之大唐取代，楊堅揀接班人的方法無錯，只可惜楊廣掩飾得太好，最後仍然揀錯接班人。

客人的有錢朋友如果想兒子守住家業，就要揀一個實實在在，做生意唔會用高槓桿比率，不能單靠成績來決定，否則，就會輸晒整個家族的資產。