《最怕睇樓市太好 下跌時一窩蜂推冧》

星期一早上去到茶餐廳，有客人話台灣人講得太好，唔怕富二代無所事事，最怕富二代雄心壯志，台灣有一個富二代網紅叫超哥，有一條講飲講食頻道叫超派人生，講得多後以身入局，自己做埋飲食，搞炸雞、海鮮丼飯、鐵板燒，點知搞一間，執一間，最後全部執晒，理由好似白宮發言人萊維特咁講，返屋企陪家人，其實是輸到怕，如果佢唔搞飲食頻道，就唔會開餐廳，就唔使輸鑊甘。

推至不合理高位 失危機意識

老闆話，香港樓市都好似富二代，唔怕樓市唔好，最怕人人睇得太好，香港樓市根基是很紮實，供求亦均衡，當中有波幅，但整體仍然是向上，但大約在10年前，大家不約而同睇樓市睇得太好，唔單止地產商及投資者睇好，連用家、銀行家對樓市都睇好，業主亦不例外，唔好價都唔賣樓，在這個情况下，樓價節節上升，新冠疫情到來，移民離開的人多了，政府又唔撤辣，內地來港買樓的人很少，令樓價下跌，銀行call loan，就跌上加跌，商業樓價一度下跌五成，住宅物業比較好啲，大約下跌三成，不少人受到重創，不少物業變成銀主盤。

很多人唔明白點解樓價可以急轉直下，其實，有一段時間大家睇樓市睇得太好，將樓價推至一個不合理高位，當大家轉軚，由睇好變唔睇好，樓價便急速下跌，所以，大家睇唔好香港樓市唔緊要，最怕睇得太好，失了危機意識，下跌時一窩蜂推冧樓市。