《買樓者輸得多 賣樓者輸得更多》

星期日早上去到茶餐廳，有客人話見返個老友，老友好耐之前以1000萬買了一個物業，10年前以1億賣畀客人，較早前物業估值跌至6000萬元，欠銀行4000萬元，日日都俾銀行追1600萬元差額，唯有賣其他資產頂住，好彩樓市略為反彈兼有成交，銀行追數先至冇追得咁行，客人恭喜老友在樓市高峰時賣走那個物業，否則就唔見4000萬元。

客人老友話，寧願當日冇賣走那個物業，今日最低限度都值6000萬元，他當日賣走物業之後，以為自己眼光獨到，很快就用3億元買返物業，除了9000萬元賺價之外，自己要攞多9000萬元出嚟，再問銀行借1.2億元，諗住安全到不得了，誰不知樓價下跌，最新估值1.8億元，輸了1.2億元，如果當日冇賣走那個物業畀客人，最多只是輸4000萬元，所以話，買樓的人輸得多，賣咗樓的人隨時會輸得仲多。

老闆話，客人的老友不是最慘，有很多在樓市賺到錢的人，相信自己的眼光，亦相信那些替他們賺錢的物業代理，既然替客戶賺到咁多錢，代理就會介紹客戶買那些劏場舖，並且話以一個車位價錢，可以買到一個舖位，並且首兩年有5%保證回報，兩年之後租金有升冇跌。老闆話結果唔使佢講，那些買劏場舖的人輸到連渣都冇，不過又不用替他們擔心，那些人大多數在物業市場賺過錢，不過，可能一鋪嘔突。