《特朗普借艇割禾 害死恩范天奴》

星期二早上去到茶餐廳，有客人話收到一個offer，買公司一個物業，價錢非常好，雖然該物業是公司非賣品，但價錢咁好，唔能夠唔將offer攞返公司。不過，睇到國際足協（FIFA）賣世界盃股權事件，會長恩范天奴可能會被迫辭職，客人擔心攞個offer返公司，結果被老闆炒魷，不如直接推咗代理算啦。

老闆話千祈唔好，恩范天奴絕對不會因為出售20%世界盃股權而被迫辭職，他只是攞個offer畀各FIFA會員考慮，或者要大會投票通過，唔賣唔使炒魷。恩范天奴如果被迫辭職，其實是受特朗普所累，在世界盃32強，美國雖然淘汰波斯尼亞，但球員巴洛根領紅，根據FIFA規則，巴洛根要自動停賽一場，在16強對比利時不能上陣。

特朗普親自打電話畀恩范天奴，唔知講咗乜嘢，FIFA紀律委員會同意停賽暫緩執行，巴洛根可以在16強對比利時上陣。不過，奸人自有奸人磨，最後美國輸1比4，唔知點解，好多人好開心。

當日大家都唔知特朗普對恩范天奴講咗乜嘢，今日有一個大概，可能係特朗普話佢女婿有興趣用42億美元，買世界盃20%股權，條件是巴洛根可以出賽，面對咁大offer，恩范天奴唔敢唔接受，咁就中了特朗普借艇割禾之計。其實，想都想到，FIFA點會批准賣世界盃股權，特朗普一毫子都唔使出就令到恩范天奴批准巴洛根上陣，至於恩范天奴會不會因為事件被炒魷，特朗普根本沒有考慮，據聞恩范天奴打電話要求幫忙，特朗普根本唔聽。有人問我，要不要炒恩范天奴，我認為一定要，咁簡單的借艇割禾都睇唔到，唔炒就假。