《香港有夜景 無夜生活》

星期二早上去到茶餐廳，有客人話昨晚同內地朋友一家人食飯，之後坐遊艇在維港兩岸睇夜景，友人一家人讚不絕口，遊完船河，朋友一家人問仲有什麼節目，茶餐廳客人話無喎，他自己很少出夜街，都唔知邊度可以繼續玩。內地朋友話，香港真係怪，世界知名城市，夜景排全世界第一，而夜生活則排同級城市第尾，甚至可以講無夜生活，香港是一個有夜景，無夜生活的城市，真係唔知點解。

老闆話，真係好奇怪，現在的年輕人比我們這一輩乖很多，當時就算結了婚，平時都唔想返屋企食飯，周末就無辦法，唔係唔返屋企食飯咁簡單，而是一般在社會工作的年輕人，很多都玩到一兩點才返屋企，撐起當時的夜生活市場。不過，大家又唔好以為只識得玩，其實，有不少生意是玩玩吓得返嚟，甲方會話，大家都唔係玩埋一齊，點解要畀生意那些人。所以，夜生活是很重要，娛樂是其次，做生意才是主要原因。

藉夜生活傾生意活動減少

現在做生意很均真，可以從網購或其他地方買到平貨，點解要畀錢你賺，雙方沒有利益交割，點解要一齊食飯，仲要去飲酒，這亦是夜生活衰退的原因之一。

有人話香港警方執法太嚴，令到市民唔敢出夜街，老闆話搵嚟講，以前未禁煙的時候，茶餐廳想搵個單身女客人都難，現在就唔同，不少女士一個人食早午餐，甚至食晚飯，無人會騷擾佢，所以才夠膽去茶餐廳食飯。警方執法嚴謹，最主要是希望市民覺得安全，夠膽出夜街消遣，享受夜生活，所以，市民千祈唔好辜負警方一番好意，市民出街消費，才會令香港經濟繁榮。