《小心碰瓷陷阱 分初中高三級》

星期六早上去到茶餐廳，有客人話剛從內地回來，今次真係老貓燒鬚，在內地可能俾人碰瓷。事緣早一晚他一個人去一間唔熟識餐廳食飯，有伙記話房間有一個客人請他入去打招呼，他當然唔肯，並且話如果佢想打招呼，應該主動出嚟，冇理由要「我」入去。到了埋單時，餐廳竟然要他埋埋房間張單，而且是天價，理由是房間客人已經離開，最後要報警，警方同餐廳負責人講了很久，最後都要賠多少才可以離開。回港後他發覺「黃總事件」，不能不佩服那位網紅，見勢色唔對立刻開直播，否則，可能被屈一張天價帳單，這些事算不算碰瓷。

老闆話算是碰瓷，不過是中級碰瓷，初級碰瓷就是有一些人見到老人家跌低，做好心扶一扶他們，就被他們的家人話老人家被那人撞低，受傷很嚴重，要求醫藥費，被碰瓷的人很難甩身，或多或少都要賠多少，所以，現在見到老人跌倒，冇人幫忙是很正常。

中級碰瓷就好似茶餐廳客人或者網紅咁，被人叫入包間，打個招呼之後出返嚟，最後要埋一張天價帳單，網紅見慣世面，所以立刻開直播，才可以逃過一劫。

最高級碰瓷就是內地一些公司請客戶食飯，叫埋香港老友去，然後在台上多謝香港老友，並且暗示老友是幕後大老闆。昨晚食完飯，明早就已經有人追數，銀碼不少，隨時追到落嚟香港，而香港人的內地友人失了蹤。有人息事寧人，以為畀多少錢搞掂，但唔畀仲好，畀咗錢就變成有證據，就算警方都會話，如果冇欠錢，點解要畀錢。所以，千祈唔好貪威，很容易俾人碰瓷。