《業主趕租客走隨時要承擔後果》

星期六早上去到茶餐廳，有客人話他租用的舖位被業主過橋抽板，捱過新冠疫情，生意好轉的時候被收樓，如果業主收回自用都冇辦法，但業主收返之後再放租咁樣就真係唔明白，業主要求客人留下所有生財工具，願意畀返多少頂手費，客人寧願將生財工具當廢鐵賣都唔賣畀業主，實行一拍兩散，據悉業主已經搵到新租客，不過，新租客出名孤寒利毒，不但要求多多，而且交租又唔準時，業主有排捱，趕客是要承擔後果。

老闆話，世界上就是如此這樣的，很多人不會珍惜眼前人，印尼的鎳礦紅土，品質其實很差，產品合格率不高，中國受邀接受開採，中國憑經驗及新型機械，不但將合格率提高，而且品質去到高水平，本以為大家可以朝着這個方向，在雙方共贏的情况下合作，但唔知點解，印尼大幅削減鎳土配額，換言之，印尼是強逼中國撤離，並希望以8000萬美元頂讓中國設備，中國企業當然唔肯，並且用1.1億美元，在21日之內將設備運回中國，螺絲釘都唔留一粒畀印尼，當印尼政府反應過來的時候，設備已經在中國領土，真係喊都無謂。

印尼總統普拉博沃以高格調迎接印度總理莫迪，老普在西點軍校受訓，行軍遣將或者可以，做業主就唔識，高格調迎接租客，一定會被租客玩死，更何况是莫迪老仙，唔玩老普對唔住自己，而且印度人有一個概念，對手賺錢代表他們蝕底，老實說，普拉博沃這個困局很難解決，唯一可以做就是稱病，由副總統接手，副總統吉布蘭是前任親華總統佐科的長子，千祈唔好被莫迪插手，否則，就好似白鱔上沙灘，唔死一身潺。