《大酒樓執笠之謎》

7月4日（美國獨立紀念日）早上去到茶餐廳，聽到有客人話，以往經常去的大酒樓要執笠，昨晚專程去幫襯，無論招呼與食物都唔掂，執笠是有理由。但是客人話唔明，當日大酒樓做得非常好，晚晚爆棚，經理寫菜都唔敢拒絕，否則經理會話咁辛苦先畀到個位你，如果拒絕佢好難做，當時咁風光，點解現在要執笠。

老闆話，大酒樓最風光的時候，亦是香港最風光的時候，整體經濟未必有現在咁好，但搵到錢的人捨得花錢，他們知道花錢可以令到別人搵到錢，如此循環不息，市民不知不覺便會富裕起來。現在的人太過叻，搵到多錢就會去日本，嫌香港質素唔夠，搵得少錢就北上消費，嫌香港唔夠平，就算留港消費都要食放題，一餐食埋下一餐，酒樓如果唔變化，根本是坐以待斃。

而事實上大酒樓同恐龍有些相似，科學家對於恐龍滅絕歸咎於宇宙災害，最常見講法就是有小行星撞地球，搞到地球見唔到陽光，缺乏氧氣，所以恐龍滅絕。但是生物學家知道，恐龍是很弱雞，甚至有一些是草食恐龍，環境稍有變化便不能生存。可能真的是有小恒星撞地球，但是有不少生物仍然可以生存，唯獨是恐龍例外。其中一個原因是恐龍體型太大，對突如其來轉變反應唔夠快，被其他動物攻擊受傷，要一段時間才可以傳到大腦，才會作出反擊，連打架都慢過人，點會不被消滅。大酒樓也是一樣，大環境很好，晚晚爆棚，梗係做得住，可以生存得到，但面對市民改變消費模式，北上消費，大酒樓唔識得轉變，最後便會被淘汰。