《連底褲都當埋 港股仲要跌》

星期三早上去到茶餐廳，有客人話，不少老友話港股好抵買，就算當埋底褲都要買，理論上有咁龐大購買力，港股想跌都難。點知港股日前不升反跌，仲要跌足5日，日日都大大鑊，星期二仲見1年新低，究竟點解。

老闆話，以他的不專業認知，有兩個可能性，第一個就是內地「call窿」，不是loan，內地投資者要班資回朝，填補較早前調來香港買股票的錢，那些錢是他們的，不是銀行的，所以是「窿」不是loan。不過，大家不用擔心，這些錢有來有往，今日返內地填窿，有機會又可以再嚟香港買股票，如果買了台灣股票就大鑊，就算可以套現，都唔知點樣將啲錢調返內地。第二個可能性就是有一些持有港股的投資者，知道內地資金一定要賣股填窿，所以他們率先賣股，到了他們認為是低位時才回補，如果股市反彈，他們就會賺很多錢。

不過仲有一個可能性，就是有不少港股是由外資基金持有，基金投資不會山盟海誓，一定會鎖定利潤/虧損或投資期限，到了某程度利潤或者虧損一定要賣，又或到了預定的時間亦會賣。我相信有不少基金投資的港股接近到期日，他們要結算亦不得不賣，如果不是撞啱內地投資者要將資金調回內地填窿，基金一定有合理利潤，現在就難講，不過，估計都唔使點輸。