2026/06/22
湯文亮
星期六早上去到茶餐廳，有客人話端午假期仲忙過返工，有幾個內地老友嚟香港睇樓，如果啱心水就即買即住，在香港讀緊書的兒子就唔使租樓，他少不免要幫忙，最低限度都要介紹信得過物業代理給內地老友。
客人問內地老友，點解要將子女送嚟香港讀書，內地老友話香港教育做得好，其他唔會差，冇理由一個教育做得好的地方，黑社會林立，風月場所五光十色，充滿騙子，而事實上香港對於內地人來說是一個學房區，大家都知道學房區的樓價是比較貴，不過是值得的。
老闆話，唔係自吹自擂，數據是不會呃人，根據最近英美權威機構報告，全世界首50間大學，香港有4間；首100間，香港有5間、中國有6間、日本兩間、新加坡兩間、台灣1間，一個地方有5間大學入百大，真係唔容易，因為養一間大學要很多錢，仲要入百大，而且除了錢之外，學術自由是很重要，香港有咁多間大學入百大，唔能夠話香港冇學術自由。
有客人問，點解有咁多內地學生來香港讀中學，當然有理由，而且理由是不能反駁，全世界100間IB成績最好的中學，香港有21間，IB成績好，可以說是入全世界名牌大學的通行證，去美國哈佛、耶魯冇問題，唔鍾意美國，咁就去英國牛津、劍橋，再唔係入內地北大、清華，有咁嘅優勢，點會吸引唔到內地學子，而且家長們深信的理由是極之有道理，一個地方教育做得好，其他唔會差。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
