2026/06/12
湯文亮
星期四早上去到茶餐廳，見到老闆黑晒塊面，大家都唔敢問，以為老闆輸了美股，道指周三跌了953點，面黑都好正常。
老闆自己話，前一晚一家人要去飲，於是請了一個親戚做夜更收銀，1000元返5個鐘，點都對得佢住。點知親戚在客人埋單時講，茶餐廳食物簡直是垃圾，又貴又唔好食，佢自己都唔會食，正一食碗面反碗底。
有客人叫老闆唔好嬲，這個情况在香港相當普遍，不少在香港搵錢的人，高薪厚職，但經常北上消費。本來北上消費是無問題，但是有一些北上消費的人話，他們本來唔想北上消費，但香港無論在食物或服務都是垃圾，無奈要北上，將北上消費責任推返畀在香港做飲食服務行業的人，其實，那些人同樣是食碗面反碗底。
最近有一名女士同個女去蘇豪東食飯，叫了一碟咕嚕肉，一碗白飯，埋單盛惠218元，條氣唔順，於是網上發文，表示自己月搵8萬元，如果唔係個女考試，迫於無奈留在香港，一定北上消費，不用在香港食埋啲垃圾。女士自己在香港搵8萬元，個女在香港受教育，但又不在香港花錢，不過都無所謂，北上消費是個人自由，不用上綱上線，驚香港唔死，典型的食碗面反碗底。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
