2026/06/11
湯文亮
星期三早上去到茶餐廳，有富二代客人話頂住條氣，佢話屋企幾兄弟姊妹，無人願意接手家族生意，他勉為其難，但疫情後，生意的確難做，而且孭上一筆沉沒成本，又要每月支生活費給各兄弟姊妹，生意出現虧損，迫不得已要賣一些祖業來解決問題。親戚朋友知道之後，都鬧佢係敗家仔，搞到佢意興闌珊，打算將生意結束，各兄弟姊妹分家便算數。
老闆話，現在的富二代、富三代真係唔好做嘢，以現時環境，就算富一代都可能會出現問題，更何况是富二代，而且躺平的富二代會被人讚賞，肯做嘢的富二代如果失敗的話，就會畀人話是敗家仔，成功是理所當然。老實說，敗家仔是一個非常嚴重指控。
我認識不少富二代，我對他們說，唔好理其他人講什麼，努力做好自己本分，就算做得唔好，都問心無愧。反而，承傳上一代財富而做嘢的富二代、富三代，雖然唔會畀外人話敗家仔，但家族財富很多時不進則退，到下一代，財富可能所餘無幾，下一代子侄要過平民百姓生活，他們就會埋怨上一代，有咁好條件都唔將家族生意發揚光大，正一敗家仔。
有一些躺平的富二代其實唔想躺平，但是上一輩人擔心他們無能力管理家族生意，於是委託專業人士管理，每個月畀返一二百萬元生活費，一二百萬元對普通人來說是很多錢，其實對那些富二代來說是很慘，飲幾支酒就無咗。他們是想做敗家仔，但是家族長輩唔准他們做，強迫他們躺平，由30歲躺平到80歲，真係好慘。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
