《劏死場就人死 唔劏自己死》

星期一早上去到茶餐廳，有客人話，星期日一個豪宅發生火警，一女身亡，一男一女危殆，有傳媒報道，那名男子從事地產行業，有「劏場大王」外號，問我是否有交流，我話名字我認識，但從未交流，簡單一句，「道不同，不相為謀」。

客人唔明白，好好的一個商場，點解要劏開百幾間賣？雖然或者會有錢賺，但十之八九，那些劏場就會變成一個死場，點解仲有人劏？

老闆話，那些劏場在未劏之前根本是一個死場，無人流，無收入，如果有穩定人流及租客，根本唔會做劏場，正是劏就人死，唔劏就自己死，劏場亦是迫不得已做法。

滿足一些人買舖虛榮心

現在有不少死場的劏場，在未劏之前，同樣是一個死場，業主花錢做裝修，劏開一百幾十間賣，滿足一些人買舖的虛榮心。我曾經嘗試勸人唔好買那些劏場舖，得到的答案是：「只用一個車位的價錢，可以買一間舖，點解唔買？」自此以後，我唔敢再出聲。

有人質疑，那些劏場舖點解可以賣得出，真佩服那些物業代理。其實，買劏場舖的投資者大多數從投資其他物業賺了錢，手上持有現金又唔知投資乜，物業代理知道他們的情况，便會介紹劏場舖給他們，不但乾手淨腳而且又保證回報，何樂而不為。賺到錢而手上持有現金的投資者早已身痕，即使銀行唔做按揭，他們都會以full pay買，銀行唔做按揭反而救了他們，否則，就算賣了劏場舖仍然欠一身債。