《「輕資產」似輕實重》

星期二早上去到茶餐廳，有客人話幾年前買入一個「商場」，現在貶值九成，好彩只是百幾萬，仲輸得起。老闆話有無搞錯，百幾萬買到一個商場，客人話係商場一個舖位，老闆話明白，如果唔講清楚，真係以為客人買了一個商場。

近日因為一名物業投資女企業家輕生，帶出一個專有名詞「輕資產」，講就好多人講，但無人知道點解，究竟什麼是「輕資產」？

「輕資產」的全名應該是舉重若輕的資產，譬喻有基金買了一幢商廈，然後以股權分拆、業權不能分拆的形式賣畀其他投資者。投資者可以同人講自己擁有那幢商廈，外人聽到就會覺得很了不起，那些投資者可以輕易買入一幢十億八億的商廈，其實是舉重若輕，他們只是擁有那幢商廈幾個巴仙股權，所以叫「輕資產」。

不過，不少「輕資產」其實似輕實重，例如某個基金集資買了一幢大廈，或者一個可以發展的地盤，本來只是集資是無問題，但如果基金以物業或者地盤抵押，向銀行借了很多錢，基金的確不用投資很多錢，可以有最大收益，在基金而言，的確是「輕資產」。其實基金不但欠投資者，同時欠銀行一大筆錢，槓桿比率太高，負債太重，稍有風吹草動，基金可能無辦法應付，那些所謂「輕資產」其實似輕實重，遇到困難就很難翻身。