《政府應考慮「唔收加一」》

星期二早上去到茶餐廳，有客人話昨晚同家人去了一間酒樓食飯，本來那間酒樓的生意平平，所以並沒有訂位。不過，去到之後，發覺酒樓爆棚，等咗個幾鐘才有位，客人問酒樓伙記點解沒有減價，生意都咁火爆，伙記話埋單就知點解，原來酒樓免收加一，想唔到效果咁大。

老闆話，如果減價，客人會以為酒樓生意唔好，所以要減價，或者將貨就價，但如果免收加一，就會認為酒樓為客人着想，就算埋單的銀碼是一樣，免收加一的酒樓都有優勢。

其實，香港政府亦應該考慮免收加一，就是免收所有隧道費，聽起來好似好荒謬，但事實上搵勻全世界，都很少見到有一個城市由南去北要收費，過海又要收費，每一項收費意味着減少汽車流量，減少市民出外消費的意欲。若果取消收費，市民就會多啲出外消費，住港島的人會去九龍，甚至新界消費，反之亦然，而且會減少北上消費次數。此外，所有隧道都是基建，市民已經交了稅，點解每一次用仲要畀錢？

一定會有人話，如果唔收隧道費，政府收入就會減少，對政府財政不利，其實，這是很容易解決，就是加汽車牌費，經常畀隧道費的市民是會接受的，就好似酒樓如果免收加一，客人是會接受加少少價。