2026/05/26
湯文亮
星期一早上去到茶餐廳，有客人話昨日去了馬場，見證三冠馬王誕生，浪漫勇士先贏1600米董事盃，再贏2000米香港金盃，昨日贏埋2400米冠軍暨遮打盃，真係值得祝賀，三冠大賽由1991年開始，30幾年只出得3隻三冠馬王，能夠即場見證，都是人生一大樂事。
老闆問，贏到三冠馬王梗係開心，但如果輸了，騎師麥道朗會不會被處罰？客人話當然唔會，不過贏到三冠馬王，麥道朗除了應有獎金，馬主的「私人醒」亦會是大數目，贏唔到都未必會無，但應該就會少好多，或者可以解讀為處罰。
老闆話咁就唔明白，較早前有一個做物業投資的女企業家輕生，不少YouTuber都出片話佢投資失利，累到很多人輸錢，最後搞到要輕生，其實同賭馬一樣，麥道朗如果輸了遮打盃，一樣有很多人輸錢，包括馬主及他的朋友，但麥道朗要不要輕生，我相信老麥從未考慮過。
老實說，樓市下跌是大環境，物業投資者差不多全軍覆沒，不少資深投資者輸到「阿媽都唔認得」，女企業家如此年輕，又如何倖免於難，投資在她身上的基金應該協助她收拾舊山河，追究責任反而是其次，現在女企業家不在，要收拾舊山河就更難。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
