《打工仔最忌慷老闆之慨》

星期四早上去到茶餐廳，有年輕客人話，今晚要同大客戶食飯，以往是由財務埋單，但今次老闆指定由佢埋單，究竟有乜嘢要注意，同埋應該畀幾多錢小費？

茶餐廳老闆話，客人的老闆應該是不滿意以往埋單的人，不但畀好多小費，而且唔會check單，餐廳對埋單同事態度非常好，甚至比老闆仲好，會計後來發覺餐廳濫收費用，但已經追唔返，所以，老闆要換人埋單。老闆提醒客人，埋單的時候一定要小心check單，而且唔好畀小費，一毫子都唔好畀，雖然可能會聽到餐廳伙計閒言閒語，甚至會話，都唔係自己錢，點解咁認真，無論他人點講，做伙記的不能慷老闆之慨。

香港議員以公帑畀議員助理花紅，有高達6個月，市民知道當然唔開心，莫講話現在仍然財赤，就算財政出現盈餘，議員都不能夠慷政府之慨。而且，那些議員助理收到花紅之後，唔會多謝政府，只會多謝那名畀花紅的議員。換句話說，如果某一名議員唔發大金額花紅畀助理，就會被他們埋怨，到最後，所有議員都被迫慷政府之慨。

不過，政府官員不是老闆，真正老闆是市民，如果官員不制止，同樣是慷老闆之慨，而且仲無人會講多謝，所以，政府應該檢討一下議員發放花紅的理由。老實說，要議員寫理由，他們就唔會申請。