《短炒獲利飈 反而要長揸》

星期三早上去到茶餐廳，有客人話剛剛賣走買入不足半年的住宅單位，扣除所有交易費用等成本之後，仍然有超過10%利潤；不過，買家立刻提價20%放盤，據聞反應都唔錯，20%可能做唔到，10%應該無問題，客人話有少少後悔，點解唔揸耐啲。

客人唔係物業投資者，唔知道業界有一句金石良言，就是當獲利短炒飈升，代表樓價將會急升。以客人的個案為例，如果買家可以在短時間內「摩走」，就算只得10%利潤，即是樓價在短時間急升，在那時候，投資者就會長揸，直至一個合自己心水的利潤才會賣走，這亦是投資口訣「等、忍、狠」的「等」，很多人誤會「等」的意思是指等樓價下跌，但等樓價下跌的不是投資者，而是對樓市沒有信心，一直唔敢買樓的人所編的藉口而已。

當樓價上升，短炒獲利增加，不少人認為，炒家炒貴樓價，不用太久，便有人會出聲叫政府重推「辣招」，但是那些人有無想過，短炒獲利，其實是增加供應，如果買樓的人長揸，或者被「辣招」逼他們長揸，供應自然減少，打算買樓的人要用更高的價錢買樓。

所以話，炒家是調節樓市，即使樓價上升都唔會升得咁急，解決樓價上升的最好辦法就是增加供應，萬試萬靈的藥方，政府已經做緊。