2026/05/08
湯文亮
星期三早上去到茶餐廳，有客人話打算買一個金額好大物業，所聘用物業代理費盡心機，只能與業主的中層員工見面，亦傾唔到任何結果，究竟是什麼問題？
老闆話，最大可能性就是代表客人去傾的代理唔夠大，業主會認為，代理只不過是試價，唔會認真去傾；而另一個可能性，就是業主與大代理是有交情，就算代表客人的代理畀到價，業主都唔會賣，搵大代理就有可能買到，到最後，梗係搵我介紹一個大代理畀客人。
美伊停戰只有中國能促成
現在全世界最大單刁就是美伊停火協議，雙方已經在巴基斯坦首都伊斯蘭堡見過面，傳媒報道雙方不但未能達成協議，甚至不歡而散，但我認為雙方在某個程度上已經達成協議。
不過，咁大單刁，雙方都唔想將人情賣畀巴基斯坦，宏觀全世界，只有中國可以促成，所以，當伊朗外長去中國見完王毅之後，道指大升超過600點。在美國方面，唔搞掂單刁，下星期特朗普去見習主席就會兩手空空，特朗普做慣生意，點會唔帶見面禮。
有客人話，美國最近送了好多武器畀以色列，和平協議可能仍然未傾掂，其實，那些武器是分手費，代表美國唔會繼續打，要打以色列自己打，好似兩個人合伙做生意，其中一個見生意唔掂想退出，一定要補償合伙人一大筆錢。所以，美國送大批武器畀以色列反而是好消息。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
