2026/05/06
湯文亮
星期二早上去到茶餐廳，有客人話唔明白，如果有人想買樓，在田土廳可以查到業主身分，點解要經物業代理做中間人？雖然現在買樓，買家未必要畀佣金，不過業主要畀雙份，如果買家直接搵業主，應付佣金可以從樓價扣除，即是減了價，買家點解唔咁樣做？
老闆話，如果買賣雙方直接傾買賣，很多時都做唔成生意，最後都是要經中間人，拉拉扯扯，唔知點解，又會將單交易搞掂。唔好講物業買賣，就算打仗打到雙方要講和，都要搵中間人，否則就很難傾得掂，除非是實力懸殊，如果是勢均力敵，就很難傾得掂。
談判有中間人 較容易傾得成
美國以色列打伊朗，基本上是「大蝦細」，但竟然打到要和談，代表雙方勢均力敵，對美國來說是非常失威，但更失威的就是雙方直接傾唔掂，要搵巴基斯坦做中間人。老實說，巴基斯坦簡直是執到寶，雖然用了很多錢，但國際地位就提高了不少，雖然和談暫時未傾得掂，但只是過程而已，如果咁快傾得掂，雙方代表點樣向政府同人民交代。
有客人話，美伊和談應該傾唔掂，伊朗擊退美國軍艦，美國亦擊沉伊朗快艇，其實，這些都是小插曲，和談過程中一定有爭拗，雙方動武只不過將爭拗化成衝突，雙方都希望和談成功，否則就唔會和談。不過，需要一些時間，油價在百美元以上將會成新常態。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
