2026/04/29
湯文亮
星期二早上去到茶餐廳，見到一個移民離開香港好耐的客人在座，當日他放棄高薪厚職移民離開，大家都不明白是什麼道理，但客人話已經賺夠，離開是止賺。客人離開之後，連續兩任接班人都被控貪污，大家才明白客人當時點解話止賺，原來賺錢的背後有很大的風險。
近日有不少物業成交，賣出價雖然與當時買入價有不少利潤，但與最高峰水平仍然有一段距離，傳媒以止賺來形容，其實並不正確。如果樓市上升，業主擔心日後有危機寧願賺少一些，而毅然出售手上物業，才可以用止賺來形容；不過，話業主止蝕又唔啱，因為業主的確有很大利潤。
老闆話，止賺比止蝕更難，就好似開一間茶餐廳，現在平平穩穩每個月都有十幾萬元利潤，如果有人用一二百萬元做頂手，買了茶餐廳的營運，他一定不會答應。或者會有人話，唔使做，唔使孭日後風險，有一兩百萬元回籠，點解唔賣？做生意的人明白，一盤生意做到有長期穩定收入，唔係咁容易，唔會輕易賣走，收租業主一樣，唔會咁輕易賣走有穩定租金收入的物業。
止蝕又唔同，如果茶餐廳每個月都蝕錢，又睇唔到前景，莫講話有頂手，就算倒貼都會賣，因為止蝕是被迫的，唔需要勇氣，但止賺是放棄收入不菲的事業或者資產，是需要很大的勇氣。不過，止賺的人會知道，如果唔放棄，隨時都會由賺變蝕，甚至身陷囹圄。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
