《奧運似一場不用給人情的婚禮》

星期六早上去到茶餐廳，有客人話2032年奧運會在沒有競爭對手下，落實由澳洲布里斯班舉辦，2036年仍然未有人認頭，如果香港牽頭，與廣州及深圳用大灣區的名義舉辦，相信成事的機會很高。但客人唔明白，點解奧運會由爭崩頭到冇人吼，是不是2008年北京奧運會太豪華，捲得太犀利，令到以後想舉辦的城市很難跟。

老闆話，無可否認，在北京舉辦的奧運會很豪華，但並不是中央政府本意，而是奧委會將規格提高，希望北京可以知難而退，但奧委會唔知中國人有「明知山有虎、偏向虎山行」性格，最後將奧運會的規格推向頂峰。以北京規格，即使打五折，其他城市都很難跟，所以，愈來愈少城市申辦奧運。

奧運會就好似一場不用畀「分子錢」（人情）婚禮，賓客只要著得靚靚便可以，主辦的人一定要蝕很多錢。如果太豪華就唔會有人搞，歷屆奧運會最成功是東京，奧運會後將選手村變成民宿，唔會浪費，最賺錢就是洛杉磯，用舊場館搞，廢物利用，點知反而有很多遊客，雖然都唔係賺好多錢，但有得賺就已經很好，最慘就是加拿大滿地可，1976年發債搞奧運，2006年才還清債務，用咗咁多錢竟然攞唔到一塊金牌，你話慘唔慘。一家人搞一個唔收「分子錢」婚禮的確好吃力，但如果幾家人一齊搞或者可行，所以，香港、廣州及深圳一起搞奧運，亦都係一個可行的方法。