《太多人「揸fit」即無人「揸到fit」》

星期三早上去到茶餐廳，雖然美伊沒有達成協議，但慶幸美國沒有攻擊伊朗，算是不幸中之大幸。有客人話非常氣頂，佢睇啱一個單位，同老先生傾到七七八八，但老先生突然過身，幾個子女都話自己可以話得事，最後大仔同意，二女話差多少，到二女都同意，孻仔又要加，搞掂孻仔，到大仔唔滿意，理由是孻仔的條件他亦曾提出過，點解當時客人唔同意，現在到佢唔同意，客人話真煩。

老闆話，客人點樣煩都不及特朗普，客人打算買的物業業主是突然過身，客人是無可奈何，而特朗普是自己攞嚟，如果不是「斬首」伊朗哈梅內伊，美伊停戰協議早已簽咗，在「斬首」哈梅內伊之後，伊朗出現很多「揸fit人」，有總統、國會議長、革命衛隊司令，他們並不是不同意美伊停戰協議的條件，而是不服其他「揸fit人」，於是要求更高條件，例如最初只是解封60億美元伊朗資產，後來升至200億美元，不同意的人認為不同意可以爭取更多利益，於是繼續不同意，在這個環境下，美伊又點可以簽到停戰協議。

特朗普冇理由唔知道，太多人可以「揸fit」，即是無人「揸到fit」，破解這個困局要以退為進，每一次伊朗反口，就要將條件收緊一些，令到不在談判桌上的人唔敢say no，才有機會達成協議，否則，只會無了期延長下去。