2026/04/22
湯文亮
星期二早上去到茶餐廳，在閒談之下，大家發覺所有客人就算有子女，都唔會超過兩個，如果香港沒有內地人移入，人口一定會萎縮，千祈唔好投資房地產。有客人話唔明白，點解香港人唔肯生仔女，唔通真係聽政府話，兩個就夠晒數。
老闆話，當然唔係，老一輩香港人成長的時候，家庭環境比較差，不少子女要瞓廳，朝行晚拆，大家都經歷一段非常辛苦的時間。當子女長大，知道自己如果不能給予他們的子女有一個比較好的環境，甚至要瞓廳，不如唔好生，養隻狗好過，即使政府近年呼籲生多啲，反應都唔係咁好。
有客人唔明白，印度與中國人口都是約14億，細數仲超過中國，但印度人口繼續增長，中國則萎縮，以中國現時0.9%出生率，大約30年，中國人口只剩5億，印度人口則超過20億。而最奇怪的是，印度國土面積約320萬平方公里，只是中國三分之一，點解印度可以養咁多人，中國反而不可以。
華人父母要給子女一個好環境才肯生
客人唔知道，印度有很多人瞓廳，「低種姓」居民佔人口大約20%，做最下等工作，居無定所，同瞓廳差不多，到這個環境，人口不但唔應該增長，反而要減少，無了期的人口增長，最後對印度會造成壓力，不過印度政府唔理，我們點解要咁多事。
反觀中國，不少父母要給子女一個好的生活及教育環境，如果做唔到寧願唔生，這就是中國人口下降的理由。不過，大家又不用擔心，當中國人口減少到某一個數字時，政府又會鼓勵生育，各項補貼接踵而來，人口又會回復增長，唔係好似專家咁講，30年後中國人口只剩5億。專家的數字是死的，現實是活的。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
