《有生意唔做 唔係生意人》

星期一早上去到茶餐廳，不少客人個樣好攰，原來唔係去睇七欖就係半夜睇曼城2：1擊敗阿仙奴，英超爭標入直路，但仍然有不少客人北上消費，當中有幾個去順德食莫氏雞煲，了解吓點解老闆話用冰鮮雞，仍然咁多人去食，客人排隊差不多要一個半小時。

莫氏雞煲話用冰鮮雞 仍吸客

客人話，莫氏雞煲並沒有用冰鮮雞，但又唔係咁突出，好似順德乾蒸排骨飯，食一次就夠，唔會山長水遠去食。客人問莫氏老闆，既然唔係用冰鮮雞都話自己用冰鮮雞，不如推出限購令，收夠籌就叫人走，莫氏老闆話全世界沒有有生意唔做的生意人，既然客人願意排隊，自己斬到手軟都冇問題，唔知幾時排隊客人會消失，就好似香港煎肉餅飯，現在應該唔係咁多人排隊。

政府曾推限奶令又推辣招

老闆話，莫氏就講錯，這個世界真係有即使有生意都唔做的人。當日不少內地人來港買奶粉，香港藥房尤其是在上水的藥房，生意好得不得了，但有人向政府投訴，由於太多內地人在香港買奶粉，令到香港人買唔到奶粉，即使業界話有足夠奶粉，唔夠可以再訂，但政府一於少理，最後推出限奶令，到現在都唔知取消咗未。不過，限奶令的確得到不少掌聲，當樓價上升，同樣被渲染話是因為內地人炒高香港樓價，政府二話不說推出辣招印花稅。有生意唔做，今日就唔好呻唔夠生意做，不過，唔想做生意的並不是香港人，而是香港政府，香港生意人是受害者。