2026/04/17
湯文亮
星期四早上去到茶餐廳，有客人話早兩日恒大老總上庭，在庭上表示懺悔，唔通良心發現？老闆話這叫做「柴桑弔孝」，假慈悲，如果真係懺悔，就應該將外國啲錢調返香港，雖然都係九牛一毛，但最少都表示誠意，懺悔有鬼用。
有客人問老闆，做茶餐廳有無問銀行借錢，應該有咁多借咁多，萬一唔掂，講一聲懺悔就可以。老闆話，莫講問銀行借錢，就算問供應商賒數都不多，唔係話供應商唔肯賒數，因為做小生意的人知道，賒數之後，貨品質素是會下降，做小生意是以本求利，唔攞錢出嚟，係賺唔到錢。
有客人唔明白，恒大點解可以借到咁多錢，當中有無蠱惑，無其他客人願意探討這個問題；不過，大家都知道，小生意是很難問銀行借錢，只能以本取利，如果做小生意問人借錢，一定要簽私人擔保，萬一失敗就要上身，一世都未必可以翻身。
大生意是以利取利，有一些大企業問銀行或者其他機構借錢，甚至發債，利息一啲都唔低，點解大企業可以畀咁高息，因為大企業是以利取利，股東是不會為貸款簽擔保，萬一失敗，是不用上身，最多只是懺悔。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
