《特朗普點解再次TACO》

星期四早上去到茶餐廳，大家都講緊特朗普點解再一次TACO，唔將伊朗打回石器時代，而且今次TACO的理由很奇怪，就是可以以伊朗的10點提議做基礎，14天之內簽訂永久停火協議。有客人話，伊朗的10點建議就算打七折，美國都是輸家，除了輸了民意之外，仲損失了中東27美軍基地以及10幾架飛機，真係唔知點解特朗普會TACO，唔通真係知錯能改，善莫大焉。

老闆話，特朗普TACO是因為鄭少秋「孤身我獨行不必相送」，打伊朗咁大件事，竟然無一個盟友參加，以色列唔算是盟友，是始作俑者。老實說，愈打愈心寒，萬一4小時內唔能夠將伊朗打回石器時代，唔通要用核彈？除了無盟友之外，美國人亦不支持，在復活節假期之前，有3000幾場反戰示威，超過900萬人參與，如果仍然一意孤行，無論贏定輸都要落台，輸當然唔使講，就算贏都是慘勝，既然結局咁差，點解唔TACO，特朗普又唔係未試過。

其實，特朗普突然發覺，自己畀人當馬騮咁玩，雖然在美國無人支持，但很多以色列人支持佢打伊朗，有一個電視台做了一個倒數計時器，準備開香檳祝賀特朗普將伊朗打回石器時代，咁嘅情况，特朗普即是做了歷史罪人，以色列就坐享其成。老實說，特朗普是頂級生意人，知道殺頭生意有人做，蝕本生意唔會有人做，打伊朗無論輸贏，一定是蝕本，所以臨崖勒馬，在最後88分鐘TACO，今次真係TACO得好。