《知道自己唔叻 所以才要做好》

星期二早上去到茶餐廳，有客人話，香港政府又換了很多公務員，他有一個疑問，香港公務員質素同我差不多，看來平平無奇，但又做得唔錯。這點很多人都不明白，尤其是新加坡人，香港公務員都無學霸，點解可以將香港搞得咁好，仲可以與紐約及倫敦並稱世界金融中心。

香港學霸唔做公務員

老闆話，新加坡是學霸才會做公務員，理由很簡單，因為新加坡人大多數是從基層出身，住組屋，新加坡總理黃循財也不例外，做公務員是一條出路，香港的尖子選擇讀醫，讀環球商科，畢業後做醫生，做投資銀行家，香港做官的大多數讀文學，唔係話他們唔叻，但讀文學，除了教書之外，做公務員是一條好出路。至於香港公務員點解做得咁好，因為他們知道自己不是一流，所以要做得好，但如果他們是學霸，就會諗自己咁叻都做唔好，其他人又點會做得好，結果就是做得唔好。

老實說，香港公務員的確做得唔錯，不少人第一次來港，在入境時已經讚不絕口，不過，就唔夠膽創新，例如回歸已經28年，的士仲要分市區、新界，其實，的士一早就要取消分界，取消之後，長途的士客一定會大增。與此同時，政府亦應該取消所有隧道收費，鼓勵市民揸車出行，市民出街，自不然會消費，而經濟繁榮是建築於消費之上，香港政府公務員唔係唔知，而係唔敢做，驚效果唔好，連份工都無埋。